百幾年嚟，電力同香港嘅社會發展可謂息息相關。喺你眼前有一條時光隧道，喺獅子山嘅輪廓下，由一條時間軸貫穿上下兩部份，上面係香港發展嘅里程碑或重要事件，下半部分就係電力喺香港嘅發展史。喺歲月長河之中，電力好似無形無相，但一直喺背後支持香港社會同經濟發展。

你聽講過1953年嘅石硤尾大火嗎？一夜之間五萬幾人喪失家園，政府為安置災民，決定興建香港第一個公共屋邨，中電特別為呢個大型屋邨設計電力供應系統，石硤尾邨亦成為日後落成嘅公共屋邨藍本。

呢條時光隧道仲展示咗香港同內地喺能源供應上嘅緊密連繫。中電喺1979年開始向廣東省供電，支持國家改革開放。1985年，中國政府與中電攜手喺廣東省興建大亞灣核電站，係內地第一個大型商業核電站，亦係中國內地改革開放以嚟，最早期同最大型嘅中外合資項目之一。

香港特區政府定下喺2050年前達到碳中和嘅目標，中電積極邁進淨零發電，配合社會嘅減碳目標，同時滿足未來嘅能源需求。

生活每一個細節都離唔開電力，電力嘅出現亦為日常生活帶嚟種種變化，提供方便。呢個展區有四個微型藝術作品，圍繞房屋、煮食、交通及娛樂四方面，分別以「寸金尺土」、「飄來飯香」、「川流不息」同「遊戲人間」作為主題，展示彷如電影中時空交錯嘅生活場景，具體表達電力點樣提升唔同方面嘅生活質素。

我哋邀請咗微型藝術家安泰分享呢四個作品背後嘅創作點滴。你可以掃描微型藝術作品右下方嘅專屬二維碼，了解更多。

電力發展為大眾生活帶嚟種種便利，過程中不乏中電嘅足跡。我哋嚟睇睇同中電相關嘅有趣物品。

你睇到嗰一對可愛嘅中電百周年紀念小熊嗎？喺小熊嘅左下方，展示咗地底電纜嘅橫切面，電纜中嘅纜芯用咗導電性良好嘅金屬材料，例如銅或者鋁，用以減少輸電過程中嘅電力流失。喺大廈林立嘅市區，好多時候就要依靠地底電纜嚟輸電。

地底電纜嘅右下方，展示咗昔日中電抄錶員嘅手繪輔助地圖，清楚標示電錶嘅位置。智能電錶出現之前，我哋需要依靠抄錶員深入社區，記錄每一位客戶嘅用電讀數，再發出電費單。喺新界地區，路比較難搵，電錶嘅位置唔喺屋入面，或者喺唐樓嘅樓梯底，猶如「親善大使」嘅抄錶員就自己畫咗呢張地圖，方便同事可以搵啱地方。喺郊外地區，抄錶員仲要帶上各種輔助工具，有手杖、望遠鏡、鏡等等。

往你左邊行過去，會見到一排抽拉式展示架，拉開第三格展板，你會見到中電曾經提供租用電器服務，喺1960年代，一個電飯煲嘅租金係每月港幣4蚊。

各位有冇曾經諗過，電力喺邊度嚟？又點樣傳送到你嘅屋企？

中電喺香港提供縱向式綜合電力業務，涵蓋發電、輸電同配電，以及市場營銷同客戶服務。喺你眼前有一個精美模型，展示發電同供電嘅旅程。

模型同埋螢光幕上唔同嘅發電設施，代表住中電採用嘅多元化燃料策略，包括天然氣、核能、堆填沼氣以及太陽能等等。

喺模型嘅左邊，係由香港兩間電力公司 - 中電同港燈，共同發展嘅海上液化天然氣接收站。接收站已經啓用，開闢新氣源，惠及香港社會。

要確保電力供應安全並源源不絕，完善穩健嘅保養工作都好重要。喺你左邊嘅影片，展示咗中電喺唔同方面嘅專業保養工作，譬如運用無人機檢查電塔，提升效率；喺極端天氣時，都有二十四小時當值嘅控制室人員、搶修人員同埋客戶服務同事，同心協力，務求盡快恢復供電。正係呢種「隨時候命」嘅精神，令我哋嘅供電可靠度達到百分之99.999，默默支撐市民嘅日常生活。

有咗上述嘅穩健電網同供電設施，加上專業保養工作，我哋為香港提供堅實穩健嘅基礎，可以朝住「智慧城市」進發。

現時天然氣喺香港嘅燃料組合比重達到百份之50，而中電及港燈共同發展嘅香港海上液化天然氣接收站，已經投入運作，令兩間電力公司可以直接從國際市場採購液化天然氣，提高能源安全，同時可爭取引入價格具競爭力嘅天然氣。

喺你眼前模型嘅最左邊，有兩艘船同一個建於海上嘅碼頭，呢個就係香港首個海上液化天然氣接收站，位於香港索罟群島以東離岸水域。喺接收站模型嘅右邊，停泊咗浮式儲存再氣化裝置船「紫荊精神號」。

由外國採購返嚟嘅液化天然氣，抵達接收站後會由液體再氣化成為燃料，經過海底管道運送到中電龍鼓灘發電廠發電，之後透過高壓架空電纜輸送到各區嘅變電站進行降壓，再輸送到各家各戶。

除咗海上液化天然氣接收站，我哋仲有兩個天然氣嘅供應來源，包括從中國內地「西氣東輸」二線管道延伸嘅海底管道，同埋嚟自南中國海嘅唔同氣田，以保障能源供應充足穩定及多元化。

隨住科技進步，香港發展成智慧城市係各界共同嘅願景同目標。香港特區政府公布嘅《香港智慧城市藍圖》同《香港智慧城市藍圖2.0》，就勾劃咗「智慧出行」、「智慧生活」、「智慧環境」、「智慧市民」、「智慧政府」同「智慧經濟」六個範疇，為呢個城市嘅發展提供方向。

科技及電力發展相輔相成，所以電力係發展智慧城市嘅重要基礎。透過中電穩健嘅電網同供電設施，香港擁有優秀嘅條件，向呢個目標進發。各位可以喺前面嘅動畫，了解更多智慧城市會點樣改善生活，例如用無人機運送食物、乘搭自動駕駛嘅公共交通工具等。

發展智慧城市時，用電需求亦與日俱增；周到詳盡嘅能源規劃至關重要。歡迎前往展區「規劃之道」，深入認識能源規劃嘅理念、細節同考量。