你眼前嘅展櫃及牌匾，展示咗中電起源同發展嘅相關文物。

1901年，中華電力有限公司喺香港註冊成立，自此一直支持香港社會同經濟發展。喺你右邊嘅展櫃，擺放住中電喺廣州沙面嘅第一座發電廠相片、1941年九龍及新界嘅輸電網絡地圖，仲有早期嘅電錶等珍貴文物。

喺你左邊，有兩個充滿歷史痕跡嘅金屬牌匾，佢哋係中電前總部嘅地址牌匾，原本放喺正門兩側嘅牆上。2012年，中電員工遷出鐘樓，牌匾經過一輪復修，就嚟到呢度同大家見面。

中電鐘樓喺1940年落成，最初名為「中電行政大樓」，係中華電力嘅總部。喺你眼前嘅模型，呈現咗由中電鐘樓同旁邊兩棟聖佐治住宅大廈組成嘅建築群，典雅瑰麗。

1960年代，隨住中電嘅業務發展，總部辦公室不敷應用，所以將中電鐘樓同隔籬嘅聖佐治住宅大廈連結起嚟，直至2012年，中電總部先至遷往紅磡。

呢三棟紅磚建築物背靠加多利山，由華人建築師關永康設計。當時正值「裝飾藝術運動」高峰期，設計採用咗第一次世界大戰後喺歐洲興起嘅現代主義建築風格，糅合簡約、對稱、幾何線條嘅設計。外牆用咗紅釉面磚，整個建築群呈現啡紅色，設計一致，呢種視覺凝聚力獲多方讚許。

中電鐘樓樓高三層，共25米高，三面外牆安裝咗由電力驅動嘅塔鐘，每個直徑為2.4米。喺手錶仲未普及嘅年代，唔少街坊依靠中電鐘樓睇時間，可以話係屬於大家嘅集體回憶。

2018年，中電鐘樓獲古物古蹟辦事處評定為一級歷史建築，活化後開放予廣大市民免費參觀，推廣歷史、文化同綠色教育，宣揚可持續發展理念。

呢度係一個光亮通透嘅天井，係中電鐘樓喺1940年代落成嘅原有建築設計。當時，天井主要用嚟通風同採光，之後為增加空間，曾經將天井覆蓋，改為辦公室使用。活化鐘樓時，移走覆蓋天井嘅層板，還原往日面貌，令室外光線可以透入展覽區內。

天井下嘅弧形牆身亦保留往昔樣貌，復修期間只係重新補上油漆，並無刻意修補磨平；加上保留原有嘅鐵窗框、手柄、海棠玻璃等，充滿歷史氣息。

天井下豎立咗一個柱體電子屏幕「時光之窗」，象徵可持續發展，節慶日子仲會換上唔同主題嘅動畫。喺天井窗戶嘅襯托下，將創新科技融入歷史建築，融合新舊，連結古今；一如中電鐘樓文化館嘅理念「珍視過去．敢創未來」，傳承歷史文化，開拓綠色未來。