實踐可持續未來係社會各界人士嘅共同願景。到底各界持份者如何為未來世代締造可持續生活？

展區內有兩本電子書，闡述咗香港特區政府嘅明確目標，要喺2050年前爭取達致碳中和，而中電亦積極配合政府政策，並會喺2040年底前淘汰燃煤發電，以及喺2050年底前達到淨零發電。

減碳之路任重道遠，除咗政府同中電，亦需要你嘅參與。你可以挑戰展區中嘅「減碳惜電大作戰」互動遊戲，測試自己日常生活習慣有無減碳嘅空間。你亦可以從展區另一邊嘅電子書中，了解中電嘅公眾教育工作，包括舉辦教育活動及參觀體驗，培養下一代嘅環保意識。

減碳除咗要有決心，創新技術亦係不可或缺。展區後面嘅「電力望遠鏡」有四個電子螢幕，介紹咗未來喺發電燃料、技術及基建層面，如何達致淨零發電。歡迎前往了解更多相關詳情。

為咗實踐淨零未來，世界各地都喺度迅速為能源轉型做好準備。喺創新科技引領下，未來喺淨零發電技術、氫能發電及智能電網嘅層面，都會有重大突破。

左邊嘅第一段動畫，係關於發展零碳電力嘅三種技術，包括配備儲能系統嘅先進可再生能源、小型模組核能反應堆，以及碳捕獲、利用及儲能嘅過程。

第二段動畫係氫能發電。氫氣主要係從電解水嘅過程中提取，當中係需要使用電力。而綠色氫能就係運用由可再生能源產生嘅電力，進行水電解而製造，過程中係零碳排放。隨住科技嘅發展，有望降低綠色氫能嘅生產成本，令日後應用更為廣泛。

第三段動畫係有關未來基建，涵蓋三項電力系統技術，包括離岸可再生能源設施、高壓直流輸電系統，以及智能電網同自動配電技術。

最後一段短片，係關於大灣區作為智慧城市先導者嘅典範。從水資源及電力、交通運輸、資訊及通訊科技方面，了解大灣區如何透過創新思維推動基建服務發展。